Lugar: Espazo EMAO -Sala de exposicións da Escola Municipal de Artes e
Oficios (entrada polas rúas Pontevedra e Rosalía de Castro) Datas: 18 de xullo ao 3 de outubro de 2013 (agosto pechado) Horario: luns a venres de 19:00 a 21:00 horas
Dentro da súa programación anual, a Escola Municipal de Artes e Oficios de Vigo (EMAO), organiza o proxecto expositivo de fin de curso, baixo a denominación de Branco e Negro.
Unha exposición do seu alumnado, coa que se quere amosar o
traballo realizado durante o curso 2012-2013 ao redor dun tema xerador
común, o que dá título á mostra, coas propostas
artísticas e artesanas dos distintos obradoiros que compoñen a Escola.
Os
proxectos que agora se expoñen son abordados dende diferentes
perspectivas, mais conservan rasgos estilísticos e conceptuais. Aínda
que o tema central é Branco e Negro, este remítese a un dualismo
relacionable con outros conceptos en principio enfrontados entre sí,
como: baleiro-cheo; luz-escuridade e ruído/son-silencio.
A proposta temática da Exposición: branco e negro
A cór desprende distintas expresións ambientais e pode transmitirnos
sensacións como calma, violencia ou maldade. De feito, as palabras
branco e negro significan a ausencia e a mestura de todas as córes, coas
consecuencias que iso implica.
O Branco, está en relación cunha sensibilidade maior ante a luz
e, ao mesmo tempo, é símbolo de: Absoluto, Unidade, Paz (que podería
relacionarse co Silencio), Inocencia e Rendición. Mesturado con outras
cores esta Non-cór, reduce o seu croma, e pode tamén crear
sensación de Baleiro, de positivo infindo, co que pode relacionarse
tamén cos dualismos antes sinalados.
O Negro, sobre todo na tradición occidental, é símbolo de: erro,
mal, misterio e inferno, e ao mesmo tempo de escuridade. No seu aspecto
positivo ten relación coa nobleza e coa elegancia; cientificamente --é
dicir, verbo da teoría da cór-- representa a unión de todas elas.
O Branco e negro, compleméntanse e anúlanse. Un é a ausencia e
outro a suma das cores, polo que, debido a este dualismo, poden tamén
ser representados xuntos creando un contraste, onde se ratifica a
importancia do concepto máis alá do obxecto ou do proceso artístico,
máis alá do resultado final. Ás veces a única luz que vemos nun cuarto
escuro pode ser a que sae do fume dos cigarros acendidos, porque entre o
branco e o negro, existen toda unha gama de grises que aportan sutís
diferencias, o que lle confire tamén ao seu emprego, un matiz de
liberdade importante.
O Branco e Negro, serve para representar nun debuxo o baleiro e o
cheo, marcando as liñas que redefinen unha contorna --o negro--, ou
para acadar luminosidade --o branco--, no medio da Escuridade. O seu
emprego axuda a revelar o oculto e a ocultar o que se desvela. No
connotativo, o branco e o negro, posúen factores psicolóxicos,
simbólicos e estéticos e, ao mesmo tempo, provocan unha forte
subxectividade.